4 жніўня 2023 года ў Крыпце Нацыянальнага мемарыяльнага комплексу «Храм-помнік у гонар Усіх Святых і ў памяць аб ахвярах, якія выратаванню Айчыны нашай паслужылі» адбылася цырымонія закладкі капсулы з зямлёй з месцаў пахавання ваеннаслужачых, якія загінулі пры выкананні службовага і воінскага абавязку. У мерапрыемстве прынялі ўдзел прадстаўнікі Мінгарвыканкама, Міністэрства абароны Рэспублікі Беларусь, дырэктар дзяржаўнай установы «Беларускі культурны цэнтр духоўнага Адраджэння» - Аляксандр Госцеў, курсанты Ваеннай акадэміі Рэспублікі Беларусь, родныя і блізкія загінуўшых воінаў. - Людзі жывыя, пакуль жывая памяць пра іх. І мы сёння робім вялікую справу па ўвекавечанні гэтай памяці. Тут прысутнічаюць маці салдат, якія ў свой час перажылі велізарнае гора – страцілі сыноў. Але, нягледзячы на гэта, яны знайшлі ў сабе сілы, каб заняць актыўную жыццёвую пазіцыю, наведваць воінскія часці, сустракацца з прызыўнікамі, падтрымліваць іх падчас службы, – адзначыў начальнік упраўлення інфармацыі – намеснік начальніка галоўнага ўпраўлення ідэалагічнай работы Міністэрства абароны Рэспублікі Беларусь палкоўнік Аляксей Ціцкі. Протаіерэй Аляксій Васін адслужыў Літыю ў памяць аб загінуўшых воінах. Таксама ў Крыпце Храма-помніка заклалі капсулу з зямлёй з месцаў іх пахавання і адкрылі памятны знак (мемарыяльную дошку) у памяць аб загінуўшых (аўтар скульптурнай кампазіцыі Аляксандр Тухто) – Мы адкрываем памятны знак у гонар нашых дзяцей, усіх ваеннаслужачых, якія загінулі пры выкананні службовых абавязкаў. Мы планавалі гэта з 1992 года, з моманту стварэння нашай арганізацыі. Хацелася, каб у адным помніку была ўвекавечана памяць аб усіх загінуўшых ваеннаслужачых, як радавых, так і афіцэрах. І сёння гэта, нарэшце, адбылося. Хочацца падзякаваць і кіраўніцтву Мінгарвыканкама, якое падтрымала гэтую ідэю, Міністэрству абароны, і кіраўніку Нацыянальнага мемарыяльнага комплексу «Храм-помнік у гонар Усіх Святых», протаіерэю Фёдару Поўнаму, які прапанаваў адкрыць памятны знак менавіта тут, у храме, – сказала старшыня Рэспубліканскага камітэта Беларускай грамадскай арганізацыі салдацкіх маці Галіна Чыгрынава. Па заканчэнні мерапрыемства, супрацоўнікамі дзяржаўнай установы «Беларускі культурны цэнтр духоўнага Адраджэння» для прысутных была праведзена экскурсія па пастаяннай экспазіцыі «Музей памяці» і Храму святочнага богаслужэння.
Па матэрыялах УП «Агенцтва «Мінск-Навіны»
