22.07.2025
Маштабны велапрабег, прымеркаваны да 80-годдзя Перамогі ў Вялікай Айчыннай вайне і 900-годдзя з дня заснавання Полацкага жаночага манастыра, завяршыўся ля Храма-помніка ў гонар Усіх святых у Мінску. Удзельнікі прабегу пераадолелі чатыры маршруты. Групы веласіпедыстаў стартавалі ад мемарыяла "Памяць", стэлы горад-герой", мемарыяла-могілак ахвярам канцлагера Шталаг-352, мемарыяльнага комплексу "Трасцянец: Урочышча "Благоўшчына". На кожнай з кропак удзельнікі велапрабегу ўсклалі кветкі да помнікаў. Пераадолеўшы маршруты, усе велааматары прыбылі да Храма-помніка ў гонар Усіх святых, дзе пасля прайшоў малебен.
Мы дзякуем Богу за мірнае неба, узносім малітвы аб спачылых і разам з тым усведамляем, што нам трэба шмат чаго зрабіць для захавання таго здабытку, які быў перададзены ад папярэдніх пакаленняў, захавання міру, згоды, яднання ў нашым грамадстве. Трэба ўпрыгожыць краіну ў Год добраўпарадкавання і пастарацца, каб нашы душы былі ўпрыгожаны цнотамі", - падкрэсліў Мітрапаліт Мінскі і Заслаўскі Веніямін, Патрыяршы Экзарх усяе Беларусі.
Міністр спорту і турызму Сяргей Кавальчук указаў, што такім мерапрыемствам удзельнікі могуць аддаць даніну памяці і павагі тым воінам, якія ахвяравалі сваімі жыццямі дзеля міру і спакою. "Я ўпэўнены, што такія мерапрыемствы будуць садзейнічаць будаванню, сіле нашай дзяржавы, спартсменаў і ўсіх беларусаў", - дадаў міністр.
Пасля завяршэння малебна Сяргей Кавальчук і мітрапаліт Веніямін падпісалі план мерапрыемстваў па комплексным развіцці і прасоўванні турыстычнага патэнцыялу рэлігійных аб'ектаў Мінска і Мінскай вобласці.
Даведачна: Маштабны велапрабег прайшоў у два этапы па тэрыторыі Брэсцкай, Віцебскай, Гродзенскай і Мінскай абласцей. Старт мерапрыемству быў дадзены 14 ліпеня ў Брэсцкай крэпасці-героі.. Арганізатарамі велапрабегу выступілі Міністэрства спорту і турызму і райвыканкамы. Ён праводзіўся сярод аматараў веласіпедных відаў спорту ва ўзросце ад 18 гадоў.
