12 лістапада 2024г. у Белай зале Нацыянальнага мемарыяльнага комплексу "Храм-помнік у гонар Усіх Святых і ў памяць аб ахвярах, якія паслужылі ў выратаванні Айчыны нашай" адбыўся нацыянальны этап Маскоўскага міжнароднага конкурсу маладых выканаўцаў рускага раманса "Беларуская Рамансіяда-2024". Трохтуравае спаборніцтва выявіла лепшых выканаўцаў раманса ў катэгорыях "Юная рамансіяда", "Маладыя выканаўцы і "Рамансіяда без межаў". Узначаліў журы лаўрэат міжнародных конкурсаў, кіраўнік і саліст мужчынскага хору "Усіхсвяцкі", мастацкі кіраўнік "Беларускай Рамансіяды" Дзмітрый Такмакоў. Члены журы: Заслужаная артыстка Расіі, дырэктар ГБУК г. Масквы "Дом Раманса", мастацкі кіраўнік Міжнароднага конкурсу "Рамансіяда" Галіна Праабражэнская; Народная артыстка Рэспублікі Беларусь Наталля Руднева; Заслужаны работнік культуры, мастацкі кіраўнік Беларускага дзяржаўнага акадэмічнага музычнага тэатра Адам Мурзіч; загадчыца кафедры спеваў і музычна-тэатральнага мастацтва, дацэнт Беларускай дзяржаўнай акадэміі музыкі Вольга Косарава; беларуская паэтка, член Саюза пісьменнікаў Беларусі і Саюза расійскіх пісьменнікаў Валянціна Паліканіна. Першы тур праходзіў па відэазапісе. 40 удзельнікаў, якія прайшлі ў другі тур, выконвалі сучасны раманс у Белай зале Храма - помніка. У трэцім туры 18 выканаўцаў выступалі ў суправаджэнні аркестра рускіх народных інструментаў Беларускай дзяржаўнай акадэміі музыкі пад кіраўніцтвам Эльвіры Тахіравай на сцэне Палаца культуры прафсаюзаў. Трэба адзначыць, што выкананне раманса з аркестрам у рамках конкурсу арганізавана ўпершыню і асаблівая складанасць выступлення ў трэцім туры была ў тым, што на рэпетыцыю з аркестрам адводзілася ўсяго 7 хвілін. У рамках правядзення нацыянальнага этапа конкурсу ў Белай зале Храма-помніка дырэктарам Дзяржаўнай Установы "Беларускі культурны цэнтр духоўнага Адраджэння" Аляксандрам Госцевым і мастацкім кіраўніком Міжнароднага конкурсу "Рамансіяда" Галінай Праабражэнскай было падпісана пагадненне аб супрацоўніцтве.
Даведачна: Міжнародны конкурс маладых выканаўцаў рускага раманса "Рамансіяда" вядзе сваю гісторыю з 1997 года. Папярэднія спаборніцтвы ішлі ў шэрагу гарадоў Расіі, а іх фінал - у Маскве, у Калоннай зале Дома Саюзаў. Конкурс праводзіцца штогод, пачынаючыся праслухоўваннямі ў верасні і завяршаючыся ў пачатку снежня. Да яго дапускаюцца артысты і студэнты творчых навучальных устаноў ва ўзросце ад 17 да 28 гадоў. Усе яны праходзяць адборачныя туры, якія ўключаюць тры напрамкі - раманс кампазітара-класіка, раманс кампазітара-сучасніка, жанравы раманс (салонны, цыганскі, акцёрскі і г. д.) Завяршаецца конкурс у маскоўскай Калоннай зале Дома Саюзаў фіналам і традыцыйным святочным гала-канцэртам пераможцаў . Да яго дапускаецца не больш за 12 удзельнікаў. Па выніках фіналу конкурсу вызначаюць лаўрэатаў першай, другой і трэцяй прэміі, а таксама дыпламантаў. Акрамя таго, аднаму з удзельнікаў фіналу, чый талент і майстэрства заслугоўваюць асабліва высокай адзнакі, магчыма прысуджэнне Гран-пры. Таксама прысуджаецца шэраг заахвочвальных прызоў — «Прыз сімпатый гледачоў», прэмія «Міс Рамансіяда» і інш. У цырымоніі ўзнагароджання бяруць удзел вядомыя дзеячы свету вакальнага мастацтва.
